尋晚收工返到屋企，老公突然間問我去唔去台灣，呵．．．原來有朋友叫佢一齊去；食完飯返到屋企睇睇日曆，再confirm吓邊日去，點知咁啱就係我生日出發

由於今日老公返夜，所以日頭有時間去拎部電話去整，然後再去做埋台証，希望順順利利啦

食完午餐就到老公去配眼鏡，一驗之下又深左，去到八百幾七百度，真係嚇左一跳

今次配呢幅眼鏡用左三千幾，真係勁。。。

老公今日休息，放工就去元朗會合，打風真係令到好谷好熱，去到原先諗住買野，專程食完碗丸腩河之後都頂唔住，立刻搭小巴走人

返到屯門開始落雨，好在落車過條馬路我地就唔使怕，因為全程都有瓦遮頭；今晚買左D海鮮西芹自己煮，都仲ok好味

尋晚老公開完夜，今日晨早番黎仲買埋老麥早晨一齊食，之後佢就等我返工就開始瞓覺；我收工嗰陣佢都瞓夠囉，今晚我地唔返屋企食飯，咁就去左附近酒樓到食晚，食完行過間名牌袋舖，入一入去睇中個平平地四佰幾嘅袋，哈...二話不說就買左，用住先啦

老公今晚又開夜，仲話要返１０點，真係食完晚飯想眠一眠都無時間，食完飯返到屋企都已經8點3，之後佢都可以訓左一陣間，有時睇見佢真係覺得辛苦，不過都好，收工之後都叫放番3日

前晚上拍賣網bid 左個notebook電腦檯，諗住可以放響張床到用；所以尋日lunch 就叫同事幫我入數，估唔到今日上晝就收到貨，真係快手。

今日起身食完野就開始執下間屋，打理下Ｄ電線，之後就同老公講，不如我買部Notebook，咁就唔會有咁多電線，我都只不過係除口講吓

食完晚飯之後，去左百老匯睇下電腦，之後去埋吉之島睇，估唔到次次都係吉之島最抵，跟住仲買埋添