星期三：出發旅行之前，都係決定去整下把頭髮，自從復活節剪過之後，d頭髮開始有d失控，所以都係決定去搵番之前幫我整開嘅髮型師，雖然響荔枝角，但原來都好方便，做埋VIP，仲有個靚number 添

星期四：Lunch 同事俾左張order lists 叫我幫佢響韓國買skin food，又唔早Ｄ講，等我可以上網睇下D產品都好嘛；收工返到屋企食埋飯，等待9點出發，真係唔好彩，老公竟然入Lift 嘅時候，跌左個鎖匙包入Lift槽，睇住插水式咁跌落去，真係人都呆晒，六合彩又唔見佢咁中．．．搭巴士去機場途中，又發現因為換左銀包，而無帶張Order lists，上機前係咁打電話俾個同事，到最終都係搵唔到佢

星期五：首爾的第一天，落機後就去第一個景點，就係去瞓覺嘅地方，我就瞓得麻麻地，然後去過東大門shopping

星期六：去黎泰阮shopping，不過落大雨有d掃慶，又去過賭場

星期日：全日都去左個樂園，地方都OK；夜晚自己搭的士去魚市場買生墨魚食，去嗰陣個司機幾好，回程嗰個仲攪笑，俾張酒店咭片佢竟然老花睇唔到，佢想打電話去酒店問路，又睇唔到個電話號碼，最後我忍唔住幫佢按

星期一：最後一戰明洞，呢到真係幾多野行，如果係同姊妹一齊去嘅話，我相信會買好多野；四日嘅旅程就完，今次領隊，導遊及個韓仔攝影師都好好，同團友都相處得ok，如果老公無咁靜就好喇；返到香港仲要專登返阿媽屋企拎番鎖匙先可以返自己屋企添

星期五：以為紅軍衫撤退之後，泰國就會好快回復番佢o既旅遊業，咁我地自由行之旅就可以繼續進行，好可惜，無啦啦個黃軍衫領袖俾人搶擊，攪到個緊急狀態令仲仍然生效，所以我地為左唔想屋企人擔心，立定決心都係唔去，因為黎緊個星期老公要考試，都唔想為左去定唔去而分心，所以機票o徙左都無法，慶幸酒店未俾錢

星期六：我收工之後同老公去左旅行社報名，用最低價錢報左個團，總算唔會浪費個假期，終於唔再成日掛住諗去唔去泰國好

星期日：原本諗住老公響屋企溫書，我就去荔枝角整頭髮，點知天文台又話會有雷暴，所以都係唔去，費事整好淋雨又無得洗頭；夜晚約左朋友去荃灣買家電，慶祝佢新居入伙，我地送左個雪櫃俾佢

星期一：成晚係咁講電話，第一次同壇垃圾o既主人傾下佢盤混帳，總算佢知道自己咩情況，希望有所改善

星期二：食完飯返屋企預備定行李，老公就最後衝刺溫書

星期二，收工去瓊華拎埋張機票，之後就開始睇衫，有件外套都幾鐘意，但明知自己會少著，都係唔睇好過，跟住好姊妹就黎到，佢都好大手筆，仲買埋我睇中件外套，今次大家都掃左五件衫一對鞋，我地兩個喜好真係好唔同，我勁愛黑色，而佢就好小選黑色　；食飯都有傾關於結婚呢個話題，唔知點解近排身邊好似離唔開結婚、生ＢＢ呢Ｄ話題！

星期三，開始睇到泰國新聞，又話有班紅衫軍示威，佢地唔使做架，咁得閒又示威，你地班大佬咪攪咁多事啦！

星期四，返到屋企又要留意泰國新聞，有時睇到真係好似一盤冷水照頭淋咁，真係無乜心機呀！

星期五，今日係復活節４日假嘅第一日，但係老公今日要開工，所以得我一個人，都好，俾Ｄ時間我攪埋壇垃圾，再等老公收工再去朋友屋企 gathering ，聽日佢就可以連放３日．．．呵呵

2009年已經過左四份一；4月嘅來臨亦都代表忙碌嘅開始；唔理咁多住，去完旅行返黎先算，星期五原先約好姊妹去ellen舖頭拎埋機票，順道睇下衫，3點半時佢打黎話今晚有事唔番舖頭，所以同好姊妹改左星期二再去，當時我嘅傷風都未發作，到老公5點收工打黎，仲問我出唔出街食飯，平時我實話我，今次唔知點解答佢返屋企食算．．．

之後一個鐘，我嘅乞嚏就一發不可收拾，不停咁打．．．返到去我連飯都唔想食，叫老公自己返屋企食，返黎就買粥俾我食，我就食藥瞓下先；佢食完返黎，話屋企又係食粥，所以拎左ｄ俾我食，哈．．．有無咁啱呀，但係好好味．．．正