原先叫左老公下晝食自己，我就會加班；大陸係咪都係返5日工架? 點解兩個客嘅email 成朝都唔覆我架！到左１點，自己手頭上嘅工作又唔係咁急，所以我都１點半走喇，可能加上老公休息，所以更加想走；

今晚同舊同事MSN ，都希望佢可以搵到份好工；其實我都好想返5日工 ，不過我地呢行真係好難實現，除非轉行

老公連休兩日，佢今晚又唔使返學，原先諗住佢會返屋企食飯，點知佢話自己煮，因為之前睇到頭條有教整椒鹽脆肉鯇，所以我叫佢煮呢樣；放７點搭車返屋企，點知等左好耐先有車，攪到老公準備好嘅晚餐都攤凍左喇，不過都係咁好味．．．正

今晚老公話司機大佬約食飯，以往每次佢吹雞我都會應約，但係唔知點解，自從嗰次４個人食飯之後，佢當時嘅情緒同發嘅脾氣，唔知係咪嚇親我，所以我今次一口拒絕；佢應該好好檢討一下自己，佢有一班對佢不離不棄嘅朋友真係佢嘅福份；可能佢呢班朋友次容忍佢，令佢跟本唔知道自己出左咩問題，所以今次我表態，只係想佢知道，唔係個個人都好似佢呢班朋友可以接受到佢呢Ｄ表現，連老公都贊成我咁做

老闆終於買左部影印機，仲今日送到黎，點知經師父解釋後，先知道有Ｄ用途唔係我地嘅原意，老闆之後又要打俾Sales  後加配件，總算可以解決到，真係唔知老闆點同人溝通，淨係聽到佢之前同個所謂 Sales 響房"哈哈哈" 

老公細細佬又唔瞓以前老公個房仔喇，佢會瞓番以前間房；而且依家星期日都總可以又大家人一齊食晚，我諗佢阿媽係至開心；

依家兩個細佬都一人一間房，咁第日我個仔咪無左間房囉．．．嘻嘻．．．．（無聊中）

今日姊妹幫我同事買嘅野拎到黎公司，要麻煩佢送埋貨真係唔係幾好意思，之後我就放工然後就去食飯，今次去個場同我上次去，真係有D唔同，完全認唔番添，之後就揀左間日本麵食，都OK 嘅 ，唔知下次去間野仲響唔響到呢，哈．．．

食飯中途，大佬打黎叫我幫佢買野，所以返到屋企附再落街，原本叫我去吉豬島睇，點知又無，之後試下走入玩斗城幫佢睇下，又俾我見到一千零一盒，真係唔知佢好彩定我好彩

今晚諗住早左兩個字過老公屋企食飯，點知佢阿媽約左7點半簽租約，叫埋我地一齊落去，臨出門口時阿Ｂ仲以為可以一齊落街，我地好不容易三個人要分3次先可以出到門口，阿Ｂ當時真係好似個細路仔咁，唔帶佢落街就響個門口到係咁望係咁嗌，真係可憐，成個人仔咁．．．

落到地產，攪完一大輪終於簽埋約，我地仲上埋去拎埋Ｄ野走，我就小負責拎走Ｄ沙煲冷瓦橕，真係手都軟呀，返到屋企開飯都9點囉

尋晚老公話隻腳好痛，所以佢今朝會去睇醫生，醫生仲寫左兩日假俾佢，加埋佢星期五已經休息，所以佢一連放3日

同事去完佢嘅7日台灣之旅，終於等到佢返工嘞，搭佢買嘅野都買晒番黎，之後就聯絡老公個朋友，我要遲多一粒鐘收工，為左送兩包佢至愛嘅鴨舌俾佢食

老公個細細佬嘅前女友終於搬走左，仲要係洗劫一空，所有有價值嘅野都搬走埋，即使無俾過錢買嘅野都搬走埋，就連窗簾布都拎埋，聽講只係剩番Ｄ公仔麵，公仔書，一堆狗毛，同埋一堆未交錢嘅單；每到呢D moment 人性嘅真臉目就會出晒黎，真係乜都可以做得出，完全可以對你豪不留情；

又或者從另一方面諗，如果對方唔會為你作出任何改變，就連應有嘅責任都無，所有野都覺得應份，咁樣落去嘅話係咪應該早ｄ分開好呢